MAGUFULI AAMUA KUJIBEBESHA ZIGO LA YANGA, SIMBA

Mgombea urais kupitia Chama Cha Mapinduzi (CCM), Dk John Magufuli, amewaahidi wanamichezo kuwa, endapo atapata nafasi ya kuwa rais, atahakikisha anaweka mikakati ya kuzisaidia timu za hapa nchini zikiwemo Yanga, Simba na Taifa Stars kuhakikisha zinakuwa mabingwa wa Afrika.

Magufuli alisema hayo juzi Jumatano alipokuwa kwenye mkutano wa kampeni za kuomba kura za urais zilizofanyika katika Uwanja wa Kawawa uliopo Kigoma Ujiji.

Mgombea huyo alionyesha mshangao kwa Tanzania yenye watu zaidi ya milioni 50, kuzidiwa kisoka na nchi ndogo zenye wananchi wachache.

“Haiwezekani wakazi wote hawa wa nchi yetu tulivalie njuga suala la michezo kutoka katika kila kona ya nchi yetu halafu baada ya muda fulani tushindwe kupata kikosi bora cha timu ya taifa.

“Suala la soka hapa nchini tunalikosea katika msingi na viongozi wanachokitolea macho ni timu za juu, yaani tukisikia michuano ya kimataifa kazi yetu ni kukimbilia timu zinazoweza kupata wachezaji wa kuliwakilisha taifa wakati serikali yenyewe haijui mchezaji huyo hata alivyolelewa mpaka kuteuliwa kuliwakilisha taifa,” alisema Magufuli na kuongeza:

“Nawaahidi Watanzania katika utawala wangu nitahakikisha nalisimamia suala la soka na michezo mingine kuanzia timu ndogo kabisa za mchangani mpaka timu za ligi kuu.”

TUNACHEZA…

Wakazi wa Kasulu Mjini wakicheza ngoma iitwayo Elijaki ambayo hutumika kuelimisha jamii kitaifa na kimataifa wakati wakimsubiri mgombea wa urais kupitia CCM, John Magufuli.