Pamoja na kupoteza mechi yake ya kirafiki dhidi ya watani wake Coastal Union, African Sports imetuma salamu Msimbazi kwamba wajiandae.
African Sports ambayo imepanda kucheza ligi kuu msimu huu,
itakutana na Simba Jumamosi ijayo kwenye Uwanja wa Mkwakwani, mechi ambayo
Simba iliyo chini ya kocha wake, Dylan Kerr itataka kushinda ili ionyeshe
mwanzo mzuri.
Katibu wa African Sports,
Hatibu Enzi, alisema kuwa hawatishiki hata kidogo kucheza na Simba na kusema
kuwa kama wakija kichwakichwa, wanaweza kuondoka na aibu ya mwaka.
Alisema kuwa baada ya kupanda ligi kuu, walifanya maandalizi ya
kukutana na timu yoyote ile ya ligi, hivyo hata Simba walishaiweka katika
hesabu zao.
“Tulishajua kwamba tutakutana na Simba, hivyo hawatutishi hata
kidogo, tunawasubiri tu waje na kama hawajajiangalia vizuri, tutawapiga vibaya
mno, wataondoka Tanga na aibu,” alisema Enzi.
Simba, katika mechi zake mbili za mwanzo za ligi, itaanzia kwenye
Uwanja wa Mkwakwani ambako haijawahi kupata ushindi kwenye michuano hiyo. Baada
ya kuivaa African Sports, itaikabili Mgambo ambayo msimu uliopita iliifunga
Simba mabao 2-0 kwenye uwanja huo.
0 COMMENTS:
Post a Comment