PAMOJA NA KUHAMIA MTIBWA SUGAR, BADO MAMBO SI MAZURI KWA CASILLAS

CASILLAS WAKATI AKIWA SIMBA...

Kipa Hussein Sharrif ‘Casillas’ hivi karibuni aliondoka Simba na kurejea Mtibwa Sugar kwa kuwa hakuwa na nafasi kikosi cha kwanza, hata alipo, bado mambo magumu.

Hadi sasa katika Ligi Kuu Bara, Mtibwa imeshacheza mechi mbili na zote langoni amekaa Said Mohamed huku Casillas akitumika kama kipa wa akiba.

Ofisa Habari wa Mtibwa, Thobias Kifaru, alisema ni mapema sana kuzungumzia nafasi za makipa hao wawili lakini Casillas ni kama kipa namba mbili.

“Mtibwa tupo vizuri, kukaa kwa Casillas benchi siyo tatizo, ligi bado mbichi kabisa, tuna michezo 30, watapokezana tu (na Said) wakati ukifika siyo kwamba atadaka Said pekee. Hata hivyo, hilo ni chaguo la kocha,” alisema Kifaru.

Mtibwa iliyo katika nafasi ya nne ikiwa na pointi sita, ilianza kucheza na Stand United kwenye Uwanja wa Kambarage mkoani Shinyanga ikashinda bao 1-0, halafu ikacheza na Toto Africans katika Uwanja wa CCM Kirumba, Mwanza nako ilishinda mabao 2-1.

Akiwa Simba, Casillas hakuweza kupata nafasi kikosi cha kwanza baada ya kuumia ugoko na hata alipopona aliwekwa benchi na wenzake Ivo Mapunda na Peter Manyika Jr.