TEGETE AAPA KUIMALIZA SIMBA LEO PALE KAMBARAGE SHINYANGA

Mshambuliaji nyota wa Mwadui FC, Jerry Tegete amesema vyovyote viwavyo atahakikisha anaifunga Simba leo Jumamosi na kuiwezesha timu yake kupata ushindi.

Mwadui inayonolewa na Jamhuri Kihwelo ‘Julio’ inacheza mechi ya Ligi Kuu Bara dhidi ya Simba kwenye Uwanja wa Kambarage mjini hapa na Tegete amesisitiza timu yake itashinda. 

Tegete ambaye amekuwa na msaada mkubwa kwenye kikosi hicho tangu ajiunge nacho msimu huu akitokea Yanga, amesema amejiandaa kuonyesha makali yake katika mchezo huo unaotarajiwa kuwa na ushindani mkubwa kutokana na kuwepo kwa baadhi ya wachezaji wanaofahamiana vizuri.

''Mechi yetu na Simba itakuwa na ushindani mkubwa kutokana na kila timu kuhitaji matokeo mazuri lakini sisi tumejiandaa vya kutosha kuhakikisha tunaifunga Simba.

“Hilo linawezekana japo ushindani utakuwepo kwa mchezaji mmoja mmoja, ukiangalia kikosi chetu kinaundwa na wazawa na wenzetu wana wageni wengi.

“Binafsi nitahakikisha naisaidia timu yangu kupata pointi tatu na kufunga bao nikipata nafasi,” alisema Tegete.