KIMWAGA ATAMANI KINOMA SIMBA IKUTANA NA AZAM FC KOMBE LA MAPINDUZI

KIMWAGA (KATIKATI) AKISHANGILIA MOJA YA MABAO ALIYOFUNGA AKIWA NA HASSAN KESSY NA JUSTICE MAJABVI

Kiungo mshambuliaji anayeichezea Simba SC kwa mkopo akitokea Azam FC, Joseph Kimwaga, amefunguka kuwa ana hamu kubwa ya kukutana na Azam katika michuano ya Kombe la Mapinduzi ili kuwaonyesha yeye ni nani.

Kimwaga ameeleza wazi kuwa, ilimuuma mno kuzuiwa kuivaa Azam kwenye mechi waliyokutana na Simba katika Ligi Kuu Bara na kuisha kwa sare ya 2-2 lakini safari hii akipata nafasi hiyo atahakikisha anaitumia ipasavyo.

Aliongeza kuwa anashindwa kuelewa kwa nini Azam inashindwa kumpa nafasi ya kuwa huru na kuonyesha uwezo wake hata anapokutana nao kwa kuwa anaamini hiyo ni njia pekee ya kuthibitisha ameongezeka kiwango kwa kiasi gani au amepungua au hana tena nafasi kwa Wanalambalamba hao.

“Nikwambie tu ukweli natamani sana nikutane na Azam kwenye Mapinduzi, sijui kama na huku nitazuiwa lakini nina hamu ya kupata changamoto yao kwenye mechi kama hizi, unajua ilipaswa waniachie tu niwe huru katika kuonyesha kiwango changu.

“Sasa sijui kwa nini wana wasiwasi kwa sababu wamenitoa kwa maana nahitaji kupandisha kiwango, waniache tu niwe huru katika kazi yangu,” alisema Kimwaga.

Katika michuano hiyo, Simba na Azam zipo kwenye makundi tofauti, kama zitafanikiwa kuvuka kwenye hatua hiyo, basi zinaweza kukutana nusu fainali au katika mchezo mgumu wa fainali.