KIPRE NAYE ANYOOSHA MIKONO MZIKI WA AMISSI TAMBWE....

Straika wa Azam FC, Kipre Tchetche, ameamua kufichua kilichopo ndani ya moyo wake kwa kutamka kuwa hafikirii kabisa kushindana na mshambuliaji wa Yanga, Mrundi, Amissi Tambwe, katika ufungaji bora wa Ligi Kuu Bara msimu huu kwa kuwa anachojali yeye ni ushindi wa Azam tu na siyo kushindana.

Tchetche ambaye amefunga mabao saba, akizidiwa matatu na Tambwe ameliambia gazeti hili kuwa Tambwe ni mchezaji mzuri na ndiyo maana anafunga mara kwa mara lakini yeye hana mpango wa kushindana naye.

“Mimi nipo kivyangu sina muda wa kushindana na mshambuliaji yeyote akiwemo Tambwe ambaye yupo kwenye kasi nzuri sana ya kufunga mabao.

“Ninachojitahidi kukifanya ni kuipigania timu yangu ya Azam kuhakikisha inapata pointi tatu kwenye kila mchezo ambazo zitatufanya tuibuke mabingwa mwisho wa msimu na hapo kama nitakuwa mchezaji mwenye mabao mengi ndipo nitafurahia,” alisema Tchetche ambaye alikuwa mfungaji bora msimu wa mwaka juzi.