KUANZA NA WAGENI 7, KERR TAFADHARI WAZAWA NI MUHIMU SANA SIMBA

FURAHA ya Wanasimba wengi ilikuwa ni kuibuka na ushinda wa bao 1-0 dhidi ya kikosi cha Ndanda FC katika mechi ya Ligi Kuu Bara katika mechi pekee ya ligi hiyo iliyochezwa wikiendi.

Kwanza nianze na kulaani vitendo vya kijinga ambavyo mashabiki wa Ndanda waliingia kwenye Uwanja wa Nangwanda Sijaona ambako Simba walikuwa wakifanya mazoezi na kufanya vurugu.

Kama haitoshi, waliwasubiri wakati wanatoka na kuwapiga mapewe jambo linaonyesha kiasi gani watu kadhaa wasivyo na uelewa, wasivyo wanadamu na wasiojua thamani ya utu. 

Vizuri Ndanda FC wasitengeneze kichaka cha wapuuzi kama hao, TFF inapaswa kulaani na Jeshi la Polisi Tanzania linapaswa kuwafikisha mahakamani hao waliokuwa wakifanya upuuzi huo ili wachukuliwe hatua na iwe mfano kwa wengine kwamba soka si matusi, ugomvi au kulenga kuumizana.

Nikirejea katika mechi hiyo kama nilivyoanza, siku hiyo Kocha wa Simba, Dylan Kerr aliweka rekodi ya aina yake alipoamua kupanga kikosi cha kwanza chenye wachezaji saba wa kigeni.

Kawaida TFF inaruhusu wachezaji saba wa kigeni, hivyo Simba iliwatumia wote katika mechi moja. Mechi ikaisha timu hiyo kuibuka kwa ushindi wa bao 1-0, mfungaji akiwa ni mzalendo, Ibrahim Ajib ‘Cadabra’.

Najua furaha ya Wanasimba ilikuwa ni huo ushindi wa bao 1-0 ambao walikuwa wakiusubiri kwa hamu baada ya sare mfululizo mara baada ya ligi iliyokuwa imesimama kuanza tena. 

Lakini hakuna aliyefikiria suala la wachezaji wa kizalendo kwamba kama hilo la Kerr kupanga wachezaji wote wa kigeni saba litaendelea, pia ni hatari kwa soka la Watanzania hapo baadaye.

Tunawahitaji wageni kama sehemu ya changamoto, ligi yetu ndiyo inakua, wachezaji wetu ndiyo wanainuka, hivyo wanahitaji nafasi ya kucheza. Kweli wanaweza kupambana na wageni lakini pia tukumbuke wanaweza kuangushwa na wageni pia.

Sijaandika makala haya kumlaumu Kerr, kwa kuwa amefanya hivyo mara moja tu. Lakini nimewahi ili kumkumbusha kwamba wageni ni sahihi lakini Watanzania wanataka maendeleo ya vijana wao hivyo ni vema wakapata nafasi.

Kama ambavyo amewapa nafasi hao wageni, basi vizuri aweze kuwapa nafasi vijana wa Kitanzania ambao wengi wana vipaji lakini wanahitaji mafunzo na morali kwa kocha wa nje kama yeye ambaye ndiyo itakuwa ni kazi yake.

Kerr anatokea Uingereza, kwa Tanzania naye ni mgeni, huenda anaweza akaangalia ushindi wa mechi yake moja au mbili bila kujali soka la Simba na Tanzania kwa ujumla pamoja na wachezaji wazawa ataliachaje. Chonde Kerr, vijana wetu wanahitaji kukua.

Tanzania inahitaji Watanzania kuiwakilisha. Kumbumbusha Kerr kuwa aendelee kuwapa nafasi zaidi wazawa, ninaamini itachangia wao kuendelea kujiamini na kutaka kufanya vizuri zaidi. Lakini pia nasisitiza suala la wao kuendelea kujituma ili kupata nafasi.

Maana yangu hivi, Kerr atoe nafasi kwa wazawa ili waonyeshe uwezo wao, lakini wakipata nafasi nao wafanye kweli, waachane na mambo ya kulalamika hovyo na kuwa na hadithi nyingi zisizokuwa na msingi hata kidogo.

Katika hili, pia ninaendelea kuweka msisitizo, TFF inapaswa kuliangalia upya suala la wachezaji wa kigeni hasa nafasi ya kipa. Sidhani kama ni sahihi kutegemea mlinda mlango kutoka nje ya Tanzania.

Kipaji cha Peter Manyika ambaye ni kinda na ana uwezo sasa kinakufa huku mkongwe kutoka Ivory Coast akiendelea kudaka. Miaka nenda rudi, Simba imeng’ara na makipa kutoka hapa nyumbani.

Hakika sikubali, ninapinga na ninaona ni uoga na usahihi uliopitwa na wakati Watanzania kutumia kipa wa kigeni wakati tuna vipaji na makipa kibao hapa nchini ambao hawana nafasi ya pa kuonyeshea uwezo wao. Si sahihi hata kidogo.