KERR ANAAMINI MWENDO WA SIMBA ULIVYO, UTAIZIDI YANGA MABAO

Kocha wa zamani wa Simba, Muingereza, Dylan Kerr, amebuka na kusema washambuliaji wa Simba kama watakuwa makini msimu huu, watafunga mabao mengi kuwazidi Yanga.

Simba kabla ya mchezo wa jana Jumapili dhidi Kagera Sugar, ilikuwa imefunga mabao 32 ikizidiwa mabao sita na Yanga.

Kerr tangu atimuliwe Simba mwanzoni mwa msimu huu, kwa sasa yupo mapumzikoni Afrika Kusini ambako amekuwa akifuatilia ligi ya Bongo kila mechi zinapochezwa.

“Tangu nilipokabidhiwa timu hiyo, niligundua kama ina washambuliaji wazuri, lakini wenyewe tu walishindwa kulitambua hilo, nadhani kwa sasa wamejua nini cha kufanya, ndiyo maana wanafunga watakavyo.

“Mchezaji kama Kiiza (Hamis) na Ajib (Ibrahim) wanao uwezo wa kufunga kila wajisikiavyo kutokana na vipaji walivyonavyo, hasa Ajib, hivyo basi nina uhakika mpaka msimu huu unamalizika basi watafunga mabao zaidi na kuzipiku timu zote ikiwemo Yanga,” alisema Kerr.