Kuelekea kwenye mchezo wao kesho dhidi ya Alliance, kiungo mkabaji wa Simba, Claytous Chama amewataka mashabiki watulie kutokana na mbinu kali ambazo wanapewa na kocha wao raia wa Ubelgiji Patrick Aussems watafanya makubwa.
Chama ambaye ni raia wa Zambia, amefanikiwa kuwa na mwanzo mzuri katika mechi alizocheza, ameweza kufunga bao moja na kutoa pasi ya bao katika mchezo wao uliopita dhidi ya Stand United ambao Simba walishinda kwa mabao 3-0.
"Kwa sasa bado ligi inaanza kushika kasi mashabiki wanapaswa wawe na subira mambo makubwa yanakuja, tunapewa mbinu kali na kocha hatuna mashaka, malengo ni kupata ushindi katika mechi zetu zote zilizobaki na tuna uhakika wa kupata ushindi katika mchezo wetu dhidi ya Alliance.
"Siri ya mafanikio ni kufuata maelekezo ya mwalimu pamoja na ushirikiano ndani ya kikosi chetu kwani tunacheza kwa kuelewana hali inayosaidia kupata matokeo mazuri, tutaendelea kupambana kuhakikisha tunashinda michezo yetu," alisema.
Simba imefikisha pointi 17 na kukamata nafasi ya tatu baada ya kucheza mechi nane nyuma ya Yanga yenye pointi 19 baada ya kucheza michezo saba, kinara ni Azam akiwa na pointi 21 baada ya kucheza michezo tisa.
0 COMMENTS:
Post a Comment