NGUVU NYINGI ZISIWE KATIKA KUMZUIA MANJI, BADALA YAKE ISAIDIENI YANGA

NA SALEH ALLY

YANGA inahitaji msaada kutoka kwa Wanayanga wenyewe, kwa kuwa hati yao hakuna anayeweza kukataa kwamba mambo ni magumu na kuna jambo linapaswa kufanyika.

Yanga ina hali ngumu kwa kuwa wachezaji hawajalipwa mishahara ingawa viongozi wamekuwa wakijitutumua kuonyesha kwamba kama vile mambo ni safi tu.

Tunajua, kwamba mambo si mazuri na huenda kipindi hiki wachezaji wamekuwa waungwana kupindukia na wavumilivu kupitiliza.

Itakapofikia siku wamechoka, basi wanapaswa kusikilizwa badala ya kuwalaumu kwa kuwa kwa sasa wako kazini lakini wanaendelea kucheza kama vile ni watu wanaojitolea.

Kitu kizuri zaidi kwao, wachezaji wa Yanga hawako katika nafasi mbaya pamoja na kuwepo kwa ugumu wa mambo ambao ni ukata.

Kwa sasa wanachokitafuta Yanga ni mtu wa kuwasaidia, mtu au watu wa kuwaondoa walipo na ndicho wanachokiangalia. Yeyote mwenye uwezo huo anaweza kuwa msaada.

Wanachama wa Yanga, zaidi wanamuamini Yusuf Manji ambaye amekuwa katika kipindi cha matibabu kwa muda sasa. Kuna jambo ambalo tunaweza kujifunza kutokana na nguvu kubwa inayotumika kumuondoa.

Naona nguvu kubwa kwa kuwa kuna mkanganyiko usio na sababu. Hivi karibuni wakati kamati ya uchaguzi ya TFF ilipotangaza, utaona kwamba ilifanyika hivyo ikiwa ni pamoja na kutangaza nafasi ya mwenyekiti, nayo ijazwe.

Wakati hali kama hiyo inatokea TFF, hakukuwa kuna barua nyingine ambayo ilitengua uenyekiti wa Manji kutoka TFF. Badala yake ipo ile inayomtambua kama Mwenyekiti wa Yanga huku ikisisitiza kwamba, Clement Sanga anapaswa kuvuliwa Uenyekiti wa Bodi ya Ligi (TPLB).

Sanga alivuliwa uenyekiti wa bodi kwa maelezo kwamba wanachama wameandika kuwa wanaendelea kumtambua Manji sababu hawakuikubali barua yake ya kujiuzulu. Sasa kwani nani alimuondoa tena Manji madarakani?

Au ndiyo ile kauli kwamba alizungumza na Dk Harrison Mwakyembe na kusema yeye hagombei? Inawezekana ni utani au mazungumzo ya kawaida ambayo si ya kiofisi.

TFF imeitisha uchaguzi wa kujaza nafasi hiyo bila ya kuwa imebadili uamuzi wake wa kumvua madaraka Sanga ambaye alionekana si mwenyekiti kwa kuwa mwenyekiti bado yuko madarakani kupitia uamuzi wa wanachama!

Sasa nani tena anakuwa na kauli ya juu kuzidi wanachama ndani ya klabu yao tena katika kitu walichokubaliana? Kama Manji aliwaomba wanachama kumsubiri amalizie matibabu, wao wamekubali, nani anawakatalia na kwa nini? 

Alisema atarejea kazini Januari na mwezi huo ndio TFF imepitisha ufanyike uchaguzi, tofauti iko wapi? Kuna jambo la kuliangalia.

Pamoja na hivyo, niwakumbushe kila sehemu kama ni TFF na hata serikali kuwa Yanga ni klabu ya Watanzania. Si lazima Manji aiongoze ndiyo itoke matatizoni, lakini kuna kila sababu ya kuheshimu mawazo na uamuzi wa wanachama wa klabu hiyo.

Kusikilizana ndilo jambo namba moja kwa watu wanaotaka kujenga jambo bora. Hivyo kama Manji anaondoka, vizuri kila utaratibu ufuatwe aende zake. Baada ya hapo Yanga iingie katika mchakato sahihi usio na walakini na kupata viongozi wao ambao wataungwa mkono na wanachama.

Nguvu kubwa sasa itumike kuikomboa Yanga katika eneo ililokwama badala ya kutaka kupambana na fulani asiwepo au asiingie. Kama kuna njia sahihi za kumuondoa, swadakta, zitumike ili kuondoa hewa ya hisia za uonevu.

Huko nyuma tumekuwa na mambo mengi ya figisu na yaliikwamisha michezo na hasa huu wa soka. Kwa sasa tunapaswa kujiepusha nayo kwa kiasi kikubwa ili kuwe na nafasi ya kujikita katika mawazo, mipango na utekelezaji wa maendeleo.

Bila Manji, Yanga inaweza kwenda. Uwazi wa mambo unaonukia haki, utatengeneza utulivu na uaminifu wenye lengo la kuendeleza soka na michezo kwa ujumla. Mtafakari.