MATOLA WA LIPULI ATUMA UJUMBE HUU KWA SHIRIKISHO LA MPIRA TANZANIA

 

KOCHA mkuu wa Lipuli FC ya Iringa, Selemani Mtola ameliomba Shirikisho la Soka Tanzania (TFF) kwa kulitaka kuwa makini katika mzunguko wa pili kutokana na baadhi ya mechi kutorushwa ‘live’.

Mzunguko wa pili wa Ligi Kuu Bara umenza kutimua vumbi hivi karibuni ambapo baadhi ya timu zimecheza mechi tatu huku nyingine zikicheza mechi mbili na Simba bado ina viporo vyake vinne vya mzunguuko wa kwanza wa ligi kuu baada ya kucheza mechi 14 tu hadi sasa.

Matola amesema kuwa, mechi za mzunguuko wa pili zimeanza kuwa na dosari kutokana na baadhi ya mechi kutoonyeshwa ‘live’ hivyo kuwaruhusu waamuzi kufanya mambo ndivyo sivyo hivyo kuharibu ligi kwa ujumla.

“Mzunguko wa pili umeanza vizuri na kumekuwa na ushindani wa hali ya juu, lakini kuna dosari ambayo imeingia ya baadhi ya mechi kutoonyeshwa ‘live’ hivyo  TFF inatakiwa kuwa  makini katika suala hilo ili kuifanya ligi iendelee kuwa na mvuto kama awali.

“Wakati mechi zote zilivyokuwa zinaonyeshwa live ilisaidia kupunguza uonevu kwa kiasi fulani kutokana na wahusika kuhofia kuonekana, lakini katika kipindi hiki cha pili kuna mechi zimekuwa hazionyeshwi ‘live’ na kuna waamuzi wameanza kufanya michezo michafu kwa timu kadhaa kulalamika kufanyiwa ndivyo sivyo.

 “Ligi inapokwenda inaelekea pabaya, hali hii ilipotea sasa inajirudia, TFF inatakiwa kuwa makini sana katika mzunguuko wa pili ili ligi iwe na mvuto na kusiwe na uonevu,” alisema Matola.