RATIBA SAWA IMETOKA, ISHU YA MDHAMINI MAMBO BADO

MSIMU mpya wa 2019-20 unakaribia kuanza kwani kwa sasa hakuna siku nyingi ambazo zimebaki kabla ya Ligi Kuu Bara kuanza.

Tayari Bodi ya Ligi Tanzania imetangaza ratiba ambayo inaonyesha kwamba Agosti 23 ligi itaanza kurindima kwenye viwanja mbalimbali hapa nchini.

Ni kitu kizuri kwa ligi kuanza ila maumivu makubwa bado yapo nyuma ya ligi kutokana na namna mambo yanavyokwenda kimyakimya.

Ninaona kwamba msimu ujao bado haujawa kwenye mpango bora ambao upo na unataka kuwa kama wengi ambavyo wanafikiria.

Ikumbukwe kuwa hata msimu uliopita baada ya ratiba kujulikana hakuna ambaye alionekana kujali kila kitu kilikwenda kimyakimya kuhusu maandalizi.

Siku ya ligi kuanza kalenda zikaanza hasa kwenye suala la mdhamini mkuu na Shirikisho la Soka Tanzania (TFF) likaweka bayana kwamba mzunguko wa pili mambo yatakuwa safi.

Ahadi yao ilikuwa kwamba wanazungumza na mdhamini mkuu hivyo watamtangaza baada ya kufika makubaliano picha iliendelea mpaka mzunguko wa pili mambo yakawa ni kimya.

Mpaka sasa bado habari ni zilezile kama msimu uliopita ndivyo ambavyo naona tunakwenda hali imeshaanza kuwa mbaya.

Kwa mdhamini mkuu hakuna anayegusia na wala hakuna dalili zozote za wazi zinazonesha kwamba msimu ujao kutakuwa na utofauti.

Mdhamini hajatangazwa mpaka muda huu ambapo timu tayari zimeanza maandalizi ya awali huku nyingine zikiwa zinakwenda kuweka kambi.

Kumbukumbu zangu zinaniambia kwamba ahadi ilikuwa msimu ujao tutakuwa na mdhaminini mkuu ambaye atasaidia kupunguza changamoto za ligi.

Nina mashaka hata msimu ujao mambo bado yatakuwa magumu kwa timu nyingi ambazo zinashiriki ligi kama hatua hazitachukuliwa.

Kuna timu nyingi za ligi mpaka sasa hazijakamilisha usajili hata mchezaji mmoja zaidi zinabomolewa tu.

Wachezaji wao wanachukuliwa na timu zenye hela huku wao wakibaki wakiwatazama wachezaji wao  wanaowapenda.

Pia tatizo kubwa lipo kwa timu nyingi hazijakamilisha malipo ya wachezaji kwa muda wa miezi mitatu mpaka sita.

Hii yote inatokana na ukata uliopo hasa kwa timu kushindwa kuwa na fedha za kujikimu na kujiendesha hasa msimu uliopita na huu wa sasa.

Hebu pata picha timu hizi Lipuli, Ndanda, Biashara United, Alliance FC na Mwadui bado hawajafanya usajili makini.

Achana na usajili huu ambao wanaufanya kwa sasa bado sio malengo yao kwani wana madeni makubwa kwa msimu uliopita

Hawa wote wanadaiwa kuanzia kwa walimu na wachezaji wanawadai mishahara na uwezo walionao ni wa kuunga tu sio kama wanapenda kufanya hivyo hawana namna.

Walimu wanadai na bado wanahitajika kufundisha hapo ndipo unapopata mtindo wa timu zetu zilivyo na mipango yao inavyoanza kuyumba mwanzo kabisa kabla ya ligi yenyewe kuanza.

Wachezaji wanadai ni haki yao na hawana mpango wa kucheza kwa morali kama ilivyokuwa awali ndio maana wengi waliopata dili la kusepa walitimka bila kuangalia ni timu daraja gani anakwenda kutumikia.

Mchezaji ni mfanya biashara ila muda mwingine thamani yake inabebwa na timu ambayo anaitumikia hivyo muda wa kujipanga kwa Shirikisho la Soka Tanzania (TFF) ni sasa.

Hakuna atakayekubali kufanya kazi muda mrefu bila kuwa na fedha ambazo zitamsaidia kuendesha maisha yake ya kila siku.

TFF wakae chini ili kuona namna gani msimu ujao utakavyokuwa, waache maneno, watimiza ahadi ambayo walitoa wao wenyewe kwa timu zote kupitia kwa Rais.

Bado mambo ni magumu nao wapo kimya nakumbuka msimu uliopita wengi walipewa taarifa ayari ligi imeanza kwamba hakuna mdhamini timu zitajiendesha zenyewe na matokeo yake ligi ikiwa inakwenda kwa kusuasua.

Wanapaswa wafanye jambo la ziada kumpata mdhamini ili kuboresha ligi ambayo awali mechi za mwanzo zilianza kuwa na ushindani ila katikati matatizo yalianza kujitokeza.

Mpira ni pesa na uwekezaji ni kitu muhimu na hili suala TFF hawawezi kulikwepa kwa kuwa ni jukumu lao kuhakikisha soka letu linakuwa na sio kudumaa kila siku.

Ubora wa ligi ya ndani unasaidia kukuza wachezaji wetu wa ndani na kuwafanya wawe bora muda wote kwenye michuano ya ndani na ile ya kimataifa.

Tunataka kuona wachezaji wengi wa ndani wanapata dili la kucheza nje ya nchi na haya hayatokei kwa bahati mbaya ni lazima timu zijipange na TFF nao wawe na mipango makini.

Rai yangu kwa TFF hili wasilichukulie kiwepesi hasa kwa wakati huu ambao dunia inakimbizana na mafanikio ya soka.