NAHODHA STARS AWAPA KAZI NYINGINE MASHABIKI

NAHODHA msaidizi wa kikosi cha Timu ya Taifa ya Tanzania, Juma Kaseja amesema kuwa bado kuna kazi kubwa ya kufanya kwa mashabiki ili kusonga mbele kwenye michuano ya Chan.

Tanzania imepenya hatua ya awali ya michuano ya Chan baada ya ushindi wa penalti 4-1 dhidi ya Kenya kwenye mchezo wa marudio uliochezwa nchini Kenya ambapo Kaseja aliibuka shujaa kwa kuokoa penalti moja.

Akizungumza na Saleh Jembe, Kaseja amesema kuwa kila kitu kwenye mpira kinawezekana hivyo kazi kubwa kwa mashabiki ni kuendelea kuipa sapoti timu mwanzo mwisho.

“Hakuna kikubwa ambacho kinatufanya tupate matokeo chanya zaidi ya nidhamu na juhudi ndani ya uwanja hivyo kazi ya kwanza ikiisha inafuata kazi nyingine, nawaomba mashabiki waendelee kutupa sapoti ili tufanye vema.

“Kitu cha kwanza ambacho kinapaswa kipewe kipaumbele ni Taifa kwanza kisha mengine yatafuata wachezaji ni jukumu letu kufanya kile ambacho kina manufaa kwa Taifa na mashabiki pia waendelee kuwa pamoja nasi,” amesema  Kaseja.