AZAM FC YAWAFUNGIA KAZI WACHEZAJI WAKE, SASA NGOMA YAZIDI KUNOGA

UONGOZI wa Azam FC umesema kuwa kwa sasa umeanza kazi ya kuinoa safu yao ya ushambuliaji inayoongozwa na Obrey Chirwa pamoja na Donald Ngoma kuelekea kwenye mchezo wa kimataifa dhidi ya Triangle United.

Azam FC inapeperusha bendera ya Taifa kwenye michuano ya kimataifa ilianza vibaya kwenye mchezo wa kwanza mbele ya Triangle FC hatua ya Kwanza ya Kombe la Shirikisho uliochezwa uwanja wa Azam Complex kwa kukubali kufungwa bao 1-0.

Akizungumza na Saleh Jembe, Kocha Msaidizi wa Azam FC, Idd Cheche amesema kuwa wameanza kufanyia kazi mapungufu waliyoyaona kwenye mchezo wao wa kimataifa.

“Tulipoteza mchezo wetu wa kwanza kutokana na kushindwa kwa washambuliaji wetu kuwa na mbinu mbadala ambazo zingetupa matokeo, tumeona namna walivyokosea na tumejifunza kwa sasa tunafanyia kazi.

“Ni makosa madogo ambayo yametugharimu lakini huu ni mpira na tunajua kwamba yote ni matokeo, kama wao wameshinda hapa basi nasi tunakwenda kushinda kwao, Ngoma na Chirwa watanolewa upya pamoja na wachezaji wengine,” amesema Cheche.

Mchezo wa marudio unatarajiwa kuchezwa Septemba 28 nchini Zimbabwe na ili Azam FC isonge mbele ni lazima ishinde kuanzia mabao 2 kuendelea.