SIMBA 'YAMLILIA' NAHODHA WAO JOHN BOCCO

BEKI Mkongwe ndani ya timu ya Simba, Erasto Nyoni amesema kuwa kwa sasa Simba inapitia kipindi kigumu kutokana na kumkosa nahodha wao John Bocco kwenye majukumu ya kazi.

Bocco anapambana kurejea kwenye ubora wake kutokana na majeraha ya goti aliyoyapata kwenye mchezo wa Ngao ya Jamii dhidi ya Azam FC, alikosa michezo miwili ya ushindani ambo ni dhidi ya JKT Tanzania na Mtibwa Sugar.

Akizungumza na Saleh Jembe, Nyoni amesema kuwa kukosekana kwa nahodha huyo kunapunguza ule utamu kamili wa Simba kutokana na uwezo wa uongozi alionao Bocco.

“Tunajua kwamba Simba ina wachezaji wengi ila kila mmoja ana umuhimu wake, kukosekana kwa Bocco kuna kitu kinakosekana pia ndani ya timu ukizingatia yeye ni nahodha mkuu kwa sasa tunamuombea apone arejee kwenye ubora wake,” amesema Nyoni.

Kocha wa Viungo wa Simba, Adel Zraine amesema kuwa mashabiki wasiwe na mashaka Bocco atarejea kwenye ligi baada muda si mrefu kuanzia sasa.