AZAM FC YAKIMBIZA MWIZI KIMYAKIMYA, HESABU ZAO SASA ZIPO HAPA

UONGOZI wa Azam FC umesema kuwa hauna presha na michezo yao ya ligi kwa kuwa wamejipanga kufanya vema jambo linalowapa nafasi ya kujiamini kupata matokeo chanya kwenye michezo yao yote.

Mpaka sasa Azam FC imecheza jumla ya michezo mitatu sawa na dakika 270 kwenye ligi na imeshinda yote imejikusanyia pointi tisa kibindoni huku ikiifukuzia rekodi ya Simba ya bila kupoteza kimyakimya.

Akizungumza na Saleh Jembe, Ofisa Mtendaji Mkuu wa Azam FC, Abdulkarim Amin ‘Popat’ amesema kuwa wanatambua ligi ina ushindani mkubwa nao wanapambana kwa kasi kupata matokeo chanya.

“Tumerejea rasmi kwenye ligi na tulianza kazi yetu mbele ya Ndanda tukamaliza na Namungo kazi inayofuata ni mbele ya JKT Tanzania hesabu zetu ni kufanya vizuri.

“Tunaamini katika kile ambacho tunakifanya, wachezaji na benchi la ufundi linafanya kazi kwa ushirikiano hivyo mashabiki waendelee kutupa sapoti kwani kazi bado inaendelea,” amesema Popat.

Azam FC kwenye michezo mitatu imefunga mabao matano na imefungwa bao 1 ikiwa na pointi tisa kibindoni kwa sasa.