HATA KAMA INAKUKERA, LA WAWA NA NCHIMBI LAZIMA LIWE NA MAUMIVU YA ZIADA

Na Saleh Ally

KUMBUKA ule msemo wa “Kila mchukuzi husifu mzigo wake”. Hii ni kawaida kwa kila mwanadamu kupenda kusifia kile anachoamini ni chake.

Wachache sana ambao wana uwezo wa kuzungumzia upungufu wa vile wanavyoamini ni vyao au vile wanavyovimiliki.

Huu ni wakati wa wapenda mpira kuamka, kuanza kukataa mambo ya kipuuzi ambayo yanajitokeza katika mchezo wa soka bila ya kujali anayefanya ni wao au wa wengine.

Unakumbuka tulishadadia kwa pamoja kuhusiana na Kelvin Yondani kumtemea mate beki wa Simba, Asante Kwasi! Bila ya ubishi hakikuwa kitendo cha uungwana na si sahihi kukiunga mkono hata kidogo.

Tulisema bila ya woga licha ya kwamba wako baadhi walijaribu kumtetea Yondani kutaka kuonyesha kama alikuwa akionewa lakini tulisimama katika usahihi na lilikuwa kosa bila ya ubishi.

Huu ni wakati wa wapenda mpira kusimama na kueleza wazi bila ya woga kuwa kitendo alichokifanya Serge Wawa, beki mkongwe wa Simba kwenda kumkanyaga kwa kumsigina mshambuliaji wa Yanga, Ditram Nchimbi si cha kiungwana na kinapaswa kutolewa adhabu ili iwe fundisho kwa wengine wenye tabia za namna hiyo.

Kuna mengi ya kusema kuhusiana na Nchimbi nje ya kuwa mchezaji wa Yanga tu, kitu ambacho kinawazuia wengi kuzungumza kwa kuwa Wawa ni mchezaji wa Simba.

Tukubali Nchimbi ni kijana wa Kitanzania, alikuwa timu kadhaa kabla ya kwenda Azam FC, baadaye Polisi Tanzania na sasa Yanga, huenda siku moja itakuwa Simba.

Pamoja na hivyo kumbukeni Nchimbi ni Mtanzania, kijana wa Kitanzania anayeitumikia Tanzania na kama nilivyosema siku moja huenda akaichezea Simba au kuiwakilisha Tanzania katika ligi mbalimbali za kwingine barani Afrika au hata Ulaya.

Nidhamu ni lazima lakini hata kama ni kazi suala la utu lazima lipewe kipaumbele kwa kutengeneza kizazi cha wachezaji wanaoweza kufikiria kuhusiana na wenzao.

Kwamba, mchezaji aanze kuangalia kama atamuumiza mwenzake atakuwa anatengeneza hasara kubwa katika maisha yake kwa kuwa hayo ndio tegemeo la maisha yake kama ambavyo anavyotegemea yeye.

Mchezaji anayetambua thamani ya kazi ya mwenzake, yake ikatambuliwa hali kadhalika. Maana yake kunakuwa na heshima ya kucheza mchezo wa ushindani unaoepusha watu kuharibiana maisha kwa makusudi.

Katika mchezo wa soka au michezo mingine kuna bahati mbaya, mnaweza kugongana na kuumizana. Kuna mmoja anaweza kumuumiza mwingine na iko wazi, kwamba inaweza kutokea bila ya kukusudia.

Wote tumeona, kwa Wawa hiyo ni tofauti na alikusudia kumuumiza Nchimbi. Unajua, hakuna kipimo cha kuumiza. Amemkanyaga akitumia kiatu chenye njumu, hawezi kuwa na kipimo aumie na asicheze mechi moja tu, badala yake anaweza kumuumiza vibaya na kumsababishia asicheze mechi nyingi au kumuanzishia tatizo litakalokuwa la kudumu ambalo litamsumbua.

Baada ya tukio hilo, mapema nilidhani Wawa angeandika jambo fulani kuonyesha anajutia hicho kitendo cha kipuuzi alichokuwa amefanya, haikuwa hivyo hadi naandika makala haya.

Huenda amedharau, anajua hakuna wa kumfanya lolote. Lakini bado nilifikiri Klabu ya Simba nayo ingekuwa na nafasi ya kuzungumza jambo kuonyesha ina msisitizo wa suala la nidhamu ili kuepuka kuwa na wachezaji wenye tabia za hovyo zinazoweza kuwa tatizo kwa timu pia.

Mazoea hujenga tabia, wachezaji wanaowaumiza wenzao kwa makusudi kuna siku wanaweza kuwaumiza pia hata wenzao kwa maana ya wanaocheza nao timu moja.

Vyombo husika vichukue hatua, Wawa anapaswa kuwa mfano kwa wengine ambao wana tabia hizo ambazo huenda zimejificha. Lakini wakati huu, watakuwa katika kipindi kigumu kwa kuwa teknolojia imepiga hatua ndio maana leo hii kwa mara nyingine baada ya wengine kuumbuka, tunaona Wawa naye akiumbuka.

Bodi ya Ligi na TFF, zina jambo la kufanya katika hili suala. Zisiwe na hofu ya kishabiki, zichukue hatua na ikiwezekana kutoa funzo kwa wengine wajue, hakuna utani katika mambo ya kipuuzi kama hayo.