KOMBE LA SHIRIKISHO LIZINGATIWE PIA KWA TIMU KUONYESHA USHINDANI

USHINDANI ndani ya uwanja kwa msimu huu wa 2020/21 unaonekana wazi kwamba ni mkubwa na hili ni jambo jema kwa afya ya soka letu la Tanzania.

 

Ikumbukwe kwamba msimu wa 2019/20 ambao ulikamilika licha ya changamoto mbalimbali ambazo zilijitokeza ulikuwa na ushindani mkubwa.

 

Kila timu ilikuwa inapambana ndani ya uwanja kusaka ushindi na mwisho wa siku matokeo yataamua nani awe bingwa. Pia wapo ambao watamaliza safari yao ndani ya ligi na kuibukia Ligi Daraja la Kwanza.

 

Kuna kazi kubwa ambayo inapaswa ifanyike pia kwa timu ambazo zimekuwa hazipati matokeo chanya ndani ya uwanja. Hakuna timu ambayo inakubali kupoteza kirahisi hivyo hapo lazima ushindani uwe mkubwa.

 

Kwa kuonyesha ushindani ndani ya uwanja kutafanya maisha ya soka la Tanzania kuzidi kupasua anga kitaifa na kimataifa kwa kuwa kila timu itakuwa inapambana ndani ya uwanja kusaka matokeo.

 

Kwa timu ambazo matokeo yao yamekuwa ni ya kusuasua ni muhimu kuongeza nguvu kwenye mzunguko wa pili ili kuweza kupata matokeo chanya.

 

Inawezekana kwa kila timu kuweza kuwa kwenye mabadiliko ndani ya uwanja na kupata matokeo ambayo ni mazuri pale ambapo wataamua na mwisho wa siku watarejesha tabasamu kwa mashabiki wao.

 

Mashabiki wanapenda kuona ligi yenye ushindani inayovutia kuitazama kila siku na sio kila baada ya mechi kuisha mtu unajutia kwa nini ulipoteza muda wako.

 

Maboresho yaanze kuanzia ndani ya uwanja na kabla ya mechi, kila mechi ipewe kipaumbele sawa bila kubagua aina ya timu kama tabia hii itaendelea itapoteza ule ushindani.

 

Pia tunaona kwamba kuna Kombe la Shirikisho ambalo linaendelea pia kwa timu kupambania nafasi zao za kuweza kutwaa taji hilo kubwa na lenye heshima.

 

Katika hili ni muhimu kila mmoja akaweza kujipanga vema kwenye mashindano haya na kuwekeza nguvu pia huku kwani wapo ambao wamekuwa wakipuuzia.

 

Ukitazama namna wawakilishi wa Tanzania Namungo wanafanya vizuri kimataifa njia yao ya kufika huko ilikuwa ni kwenye Kombe la Shirikisho ambalo wapo ambao wanaliona ni la kawaida.

 

Muhimu kwa timu shiriki ni kuwekeza nguvu pia huku ili waweze kupata matokeo mazuri ndani ya uwanja. Ili kupata matokeo mazuri ni lazima kuwe na maandalizi mazuri.

 

Ikiwa timu itapata muda wa kufanya maandalizi mazuri itakuwa na nafasi ya kupata matokeo chanya ndani ya uwanja.

 

Kila kitu ndani ya uwanja kinahitaji utulivu pamoja na umakini. Kupata matokeo mazuri ni jambo ambalo linahitaji maandalizi hivyo ni muhimu kwa kila timu kuanza kutazama jambo hili kwa ukaribu.

 

Mashabiki nao wana kazi ya kuendelea kuzipa sapoti timu zao ndani ya uwanja ili kuweza kuongeza hamasa kwani mpira unahitaji mashabiki pamoja na zile shangwe za mashabiki.

 

Bado imekuwa ikionekana kwamba mchezo wa fainali unapelekwa mbali na Dar ikiwa ni sera ya kukuza soka na kupekeka burudani kule ambako bado hakujawa na shangwe la kutosha.

 

Katika hili bado tunahitaji kujifunza zaidi ili kuwa bora kwa kuwa haya mashindano ya FA siyo madogo na kila mmoja ana kazi ya kujua namna gani hili linaweza kuwa bora zaidi kwa wakati ujao.

 

Tujifunze kwa wenzetu Uingereza lazima fainali ya FA ichezwe Wembley, maana yake nini mchezaji anakuwa anaona fahari kucheza kwenye uwanja mkubwa wenye hadhi sawa na mashindano yenyewe.

 

Sasa leo sisi tunapeleka fainali Lindi, Kigoma, Rukwa hata Mbeya pia inaweza kufika ila hapo jambo la kujiuliza ni kwamba sehemu ya kuchezea ina hadhi ya kimataifa?

 

Bado fainali itabaki kuwa fainali kwa kuwa kuna mengi ambayo yanafanyika kisha namna wachezaji ambapo wanapambana kufika hapo na mwisho wa siku wanacheza kwa kujilinda zaidi wasitoe burudani kutokana na tatizo la uwanja.

 

Kila kitu ni mipango hivyo kwa sasa ni muhimu maboresho yakafanyika na kukawa na utaratibu mzuri kwa ajili ya kuwa na sehemu nzuri ya kuchezea fainali ya FA.

 

Fainali huwa inafuatiliwa na wengi hivyo ikiwa itachezwa sehemu nzuri ya uwanja itatoa fursa kwa wachezaji kuwa sokoni na kucheza kwa kujiamini mwanzo mwisho.

 

Ifike wakati iwe inajulikana kwamba kama ni fainali ya FA lazima ifanyike kwenye uwanja wa Taifa kwa kuwa una hadhi ya kimataifa itatoa heshima kwa timu ambazo zinashiriki michuano hiyo.

 

Muda ni sasa wa TFF kufanyia maboresho haya matatizo ambayo yanajitokeza mara kwa mara na kusimamia vitu vya soka kwa utaratibu ambao unaleta matokeo bora.

 

Kila kitu kinawezekana endapo tutaamua mwisho wa siku suala la ratiba nalo linapaswa litazamwe kabla ya kupanga mechi ambazo ni muhimu kwa kila timu kupata ushindi.