KOCHA SIMBA AMTAJA KIUNGO WA DODOMA JIJI ALIYEMVUTIA

KWA mara ya kwanza, Kocha Mkuu wa Simba,

raia wa Ufaransa, Didier Gomes Da Rosa,

ametoa kauli ya kuonyesha wazi kuvutiwa na

uchezaji wa kiungo mshambuliaji wa Dodoma

jiji, Dickson Ambundo.

Juzi Jumatano, Gomes alikiongoza kikosi chake

kwenye mchezo wa robo fainali ya michuano ya

Kombe la Shirikisho la Azam Sports (ASFC),

ambapo Simba ilifanikiwa kutinga hatua ya

nusu fainali ya michuano hiyo, baada ya

kuibuka na ushindi mbele ya Dodoma Jiji mabao 3-0 kwenye Uwanja wa Mkapa, Dar.

Akizungumza na Championi Ijumaa baada ya

mchezo huo kumalizika, Gomes alikishukuru

kikosi chake kwa kufanikisha malengo yake ya

kuingia hatua ya nusu fainali, lakini

aliwapongeza Dodoma Jiji kwa mchezo mzuri

huku akikiri wazi kuvutiwa na uchezaji wa

Ambundo.

“Mchezo wetu haukuwa rahisi kama wengi

wanavyodhania baada ya kupata ushindi,

kimsingi niwapongeze wachezaji wangu kwa

kufikia lengo la kuingia hatua hii, ila pia

niwapongeze wapinzani wetu Dodoma Jiji kwa

mchezo mzuri, ila nimevutiwa zaidi na kiungo

wao mshambuliaji Ambundo.

“Uchezaji wa kiungo huyo, unaonyesha kujua

zaidi majukumu yake uwanjani na ndiyo maana

utaona alitusumbua kiasi cha kunifanya nifikirie

kwa umakini namna ya kumdhibiti na ndiyo

maana niliingiza viungo kama Erasto Nyoni,

Mzamiru Yassin na Thadeo Lwanga,” alisema

Gomes.