KIBADENI AKUBALI KWAMBA MASHABIKI WANAMZOMEA KIPA SIMBA KWA KUWA WANATAKA KASEJA ARUDI

Kocha Mkuu wa Simba, Abdallah Kibadeni, amekubali kwamba mashabiki wa Simba wanamtaka kipa Juma Kaseja.

 Mashabiki wa timu hiyo wamekuwa wakimzomea kipa namba mbili wa timu hiyo, Andrew Ntalla, kila anapokosea uwanjani, lakini kocha huyo amesema wanafanya hivyo kwa kuwa wanamtaka Kaseja.

 Kaseja kwa sasa hana timu baada ya kumaliza mkataba wake na Wekundu hao wa Msimbazi msimu uliopita.

Mara baada ya kipa huyo kumaliza mkataba huo, uongozi wa timu hiyo haukumuongezea mwingine na kumsajili Ntalla kutoka Kagera Sugar kuziba pengo lake, lakini kipa huyo amekuwa akionyesha kiwango cha chini kwenye kila mchezo anaocheza.

Kibadeni ambaye amejiunga na timu hiyo msimu huu akitokea Kagera alisema mashabiki hao wamekuwa wakipiga sana kelele  kila anapokosea kidogo, jambo ambalo siyo sawa.

“Mashabiki wa Simba wanamzomea  sana kipa wetu wa sasa wakitaka Juma Kaseja arudi katika kikosi chao, tena  wamekuwa wakifanya hivyo mara kwa mara.

“Tabia wanayofanya mashabiki wetu sio nzuri, kwa kweli wanatakiwa kuisapoti timu kuikatisha tamaa na kuivunja moyo timu hasa wachezaji siyo kitu kizuri kabisa na kinaweza kuleta matatizo.

“Ni lazima wakubali ukweli sasa kuwa Juma hayupo Simba japo siwezi sema kwamba hawezi kurudi katika timu hii, lakini kwa sasa wakubali tu wale waliopo na wawape ushirikiano na kuwapa sapoti siku zote na kuwatia hamasa zaidi ili wahakikishe wanafanya vizuri tu kwan mabadiliko yapo siku zote,”alisema Kibadeni.