BUSUNGU ASEMA ANAIJUA KAZI YA TAMBWE, LAKINI ATAPAMBANA KINOMAAA

Straika mpya wa kikosi cha Yanga, Malimi Busungu, ambaye amejiunga hivi karibuni na klabu hiyo, ametamka wazi kuwa, licha ya kutambua ushindani wa namba uliopo katika kikosi cha kwanza cha timu hiyo, haogopi kitu kwa kuwa anaamini uwezo wake.

Busungu ambaye anaimudu vyema nafasi ya ushambuliaji, ametua Yanga kwa mkataba wa miaka miwili huku akifanikiwa kulamba milioni 25 kama fedha za usajili ambapo akiwa ndani ya uzi wa klabu hiyo, anatarajia kukumbana na upinzani mkali kutoka kwa straika mwenzake, Mrundi, Amissi Tambwe. 

Busungu alisema kuwa licha ya kutambua ugumu wa kumuondoa Tambwe ndani ya kikosi cha kwanza, lakini anaamini kuwa ataweza kufanikiwa katika jambo hilo kutokana na uwezo wake.

“Ninafahamu jinsi ushindani wa namba katika kikosi cha kwanza ulivyo hapa Yanga ambapo washambuliaji wake wapo katika viwango vya hali ya juu ambapo wote tulishuhudia jinsi walivyokuwa wanapachika mabao, hasa Tambwe ambaye alimaliza juu yangu.

“Ila mimi sina hofu yoyote ya kuingia katika kikosi cha kwanza kwa sababu ninaamini juu ya kiwango changu ambapo nitafanya jitihada kubwa ya kuweza kumshawishi kocha katika mazoezi ili anipange katika kikosi cha kwanza,” alisema Busungu.

Tambwe alifanikiwa kufunga mabao 14 msimu ulioisha na kuwa amemzidi Busungu kwa mabao matano lakini straika huyo amesema atapambana mpaka kieleweke.