SAMATTA AAHIDI KUREJEA BONGO BAADA YA MIAKA 20

Mshambuliaji nyota wa TP Mazembe, Mtanzania, Mbwana Samatta amesema atarejea na kucheza nchini baada ya miaka 20 ijayo.

Samatta amesema angependelea kuendelea mbele zaidi kisoka katika nchi nyingine za Afrika au Ulaya, halafu kama ni nyumbani Tanzania, atarejea baada ya miaka 20.

“Baada ya miaka 20, nitarudi na kucheza hata kama ni bure. Wakati huo nitakuwa nimemaliza mambo yangu.

“Kuna ofa kutoka katika timu mbalimbali za Ulaya na Afrika, lakini bado sijajua itakuwaje,” alisema Samatta.

Mtanzania huyo ndiye tegemeo la Tanzania katika kikosi cha timu ya taifa, Taifa Stars.

Pia ndiye tegemeo katika kikosi cha wababe hao wa DR Congo, TP Mazembe kutokana na uwezo wake mkubwa wa kupachika mabao.

Samatta alianza kuonyesha cheche zake akiwa katika timu ya daraja la kwanza ya Mbagala Market ambayo baadaye ilikuwa African Lyon.

Baadaye akasajiliwa Simba ambayo hakumaliza hata msimu kabla ya kusajiliwa TP Mazembe.