KUMEKUCHA, KMC WAANZA KUIVUTIA KASI AS KIGALI YA HARUNA NIYONZIMA

BAADA ya KMC kulazimisha suluhu ya bila kufungana kwenye mchezo wa awali wa Kombe la Shirikisho dhidi ya AS Kigali ya Rwanda leo kinaanza mchakato wa kuwainda wapinzani wake.

AS Kigali ya Rwanda imemsajili nyota wa zamani wa Yanga na Simba Haruna Niyonzima ambaye alimalizana na Simba msimu uliopita.

Akizungumza na Saleh Jembe, Ofisa Habari wa KMC, Anwari Binde amesema kuwa baada ya kikosi kurejea kocha alitoa mapumziko ya siku moja.

“Kikosi kilirejea salama Jumapili, na Kocha Mkuu Jackson Mayanja akawapa wachezaji siku moja ya kupumzika leo wanaanza maandalizi kwa ajili ya mchezo wa marudiano dhidi ya AS Kigali.

“Kuna mengi ambayo tumejifunza na benchi la ufundi limeyaona na linayafanyia kazi, kwenye mchezo wetu wa marudiano hakuna namna lazima tushinde tu mashabiki watupe sapoti,” amesema.

KMC inatarajiwa kurudiana na AS Kigali kati ya Agosti 23-25 jijini Dar.