INAELEZWA kuwa baadhi ya mashabiki wa soka Burundi wamepanga kumuaga kwa dua staa wa nchi hiyo Said Ntibazonkiza wakati akiwa anakuja Bongo kuungana na timu yake mpya Yanga.
Taarifa kutoka Burundi zinasema, Warundi wanataka kufanya jambo hilo ili kumpa nguvu mchezaji huyo baada ya kuonyesha kiwango kizuri kwenye michezo mitatu aliyocheza na timu ya Taifa ya Burundi, akifunga mabao manne katika michezo mitatu ya hivi karibuni.
“Kuna mashabiki wa soka hapa Burundi wamepanga kumfanyia dua Ntibazonkiza ambaye anatarajia kuja huko Tanzania, wao wanasema wanataka awe vizuri na asipate majeraha kwa kuwa amekuwa na mchango kwenye timu ya taifa, lakini pia wanataka akawasaidie Yanga waliomuamini baada ya kukaa muda bila timu,” kilisema chanzo hicho kilichoomba hifadhi ya jina.
Championi lilimtafuta mtu wa karibu na mchezaji huyo, Alexander Kitenge ambaye aliwahi kucheza Stand United ambapo alisema kuwa: “Kwa Burundi hiyo ni kawaida kwa mashabiki kuwafanyia dua wachezaji wao. Unajua Ntibazonkiza ni mchezaji mkubwa Burundi na anapendwa sana na watu.
“Hata wakati ambao hana timu, mashabiki walikuwa wanamuombea sana arejee uwanjani na kwenye timu ya taifa, kweli Mungu akasaidia akarudi kwenye timu ya Burundi, alicheza mechi moja, Yanga wakamsajili, kwa hiyo watu wa huku wamefurahi sana na ndiyo maana wanataka kufanya hivyo.
“Hata mimi nimefurahi sana kumuona amerejea tena baada ya miezi mitano na ninakuambia atawasaidia sana Yanga, Ntibazonkiza akiwa uwanjani lazima kitu kitokee, kwa sababu hata mimi ninapocheza naye hapa timu ya mtaani, huwa anafunga sana. Yule jamaa ni bonge la namba 10,” alisema Kitenge.
Ntibazonkiza anatarajia kutua nchini Desemba 15, tayari kwa kuanza kibarua chake ndani ya Yanga ambayo ilimsajili Okotoba.
Mfanyieni dua na sisi huku tutampokea uwanja wa Taifa kwa maandamano
ReplyDelete